Syair Aceh "THON POLITIK"

Syair Aceh
"THON POLITIK"
Oleh : Cek Medya Hus

Aneuk tiyong di cong bak u
Leupah karu kadi klik klik
Nyoe rap trok jan nyan pemilu
Takheun laju THON POLITIK

Katrok masa raja bantu
Pileh laju presiden baik
Sabang maroeke tanyoe bre su
Serentak pemilu kala'en trik

DPD Legislatif, pilih bangku
Barat timu suhu naik
Mandum timses poles bumbu
Jak mita su deungon taktik

Nyoe ka toe ngon pemilu
Haba karu bhah politik
Lam berita macam lagu
Na na yang rayu na nyang tijik

Karena go nyoe, nyoe pemilu
Sigo bi su dalam bilik
Pres..legislatif pilih itu
Barat timu sigo kutik

Tapi gura nyoe ka ta eu,
Berita seu u THON POLITIK
Kamulai bagi susu
Mita bangku saka tijik

Dukung mendukung langsong laju
Pujoe payu, beutoi ngon kritik
Peu 'ek peutron ampon Teungku
Lam pemilu cit na taktik

Na nyang galak ajak laju
Awam Teungku tuha putik
Na nyang hantuenng kaleueng batu
Di glueng laju keudeh itiek

Pencitraan nyan that laku
Nyang kon Teungku jinoe baik
Nyang kon tokoh meu'oh meusu
Nyang h'an mampu le nyang lirik

Katroh musem peutem abu
Lagee nafsu bahue tijik
Memang meunan lam pemilu
Bek jeut karu lam politik

Tanyoe rakyat bek that seu u,
Ikot laju jalan baik
Bek meupake watee bre su
Bek na karu surak ngon klik

Beu tatu'oh 'oh pemilu
Paksa rayu cit meunan biek
Peubeutoi droe ragoe get su
Saboh kuru tameupriek priek

Cit limong thon nyan pemilu
Gob tabantu bek ta meugliek
Demokrasi 'oh tabi su
Lheuh pemilu tanyoe baik

Beuna ingat bek that seu u
Bek na karu lam politik
Duson kuta bek keliru
Barat timu muda ngon syik,

Tameulakee teuntee laju
Bak Tuhanku deungon baik
Dame aman lam pemilu
Nanggroe makmu jroh politik.